માતૃભાષા ગુજરાતી છે | ગુજરાતી | કવિ તુષાર શુક્લ

માતૃભાષા ગુજરાતી છે | ગુજરાતી | કવિ તુષાર શુક્લ માતા છે ગુજરાતની ધરતી , માતૃભાષા ગુજરાતી છે આ માટીમાં મૂળ અમારાં , ગુજરાતી મહાજાતિ છે. મોરપીચ્છ શી કદી મુલાયમ, કદી તાતી તલવાર , કદી ડણકતા સાવજ જેવી, કદી મયૂર ટહૂકાર કદી વહે આરાધ થઇને , મીઠી કદી પ્રભાતી એ માતૃભાષા ગુજરાતી છે. કદી કસુંબલ રંગપિયાલી, આંખ મહીં અંજાય શૂન્ય શિખર પર સહજ સમાધિ, પરખંદે પરખાય ધૂળ નથી છે કૂળ અમારું વતન તણી છે માટી એ માતૃભાષા ગુજરાતી છે. આવે કોઇ તો " આવો " કહેવું , "આવજો " જ્યારે થાય વિદાય નામની પાછળ " ભાઇ-બહેન" પણ માન દઇને બોલાવાય ગાંધી ને સરદારની ભાષા હૈયે જઇ સમાતી એ માતૃભાષા ગુજરાતી છે. આજે રોકડા, ઉધાર કાલે થોડામાં એ કહે ઘણું ભૂલચૂક સહુ લેવીદેવી સૂત્ર અનોખું જીવન તણું આપણે એને સાચવશું , જેમ આપણને સાચવતી એ વરખ વિનાના હરખ જેવી માતૃભાષા ગુજરાતી છે. #tusharshukla #gujarati #matrubhasha