કૈંક ગમતું આવીને મને ઘેરે | Kaik gamtu aavi nemane ghere | PremGeet | Kavi Tushar Shukla

કૈંક ગમતું આવીને મને ઘેરે | Kaik gamtu aavi nemane ghere | PremGeet | Kavi Tushar Shukla કૈંક ગમતું આવીને મને ઘેરે. ઓળખાતું ન્હોય તોય ઓળખીતું હોય એમ અડકી અડકીને મને, લ્હેરે કૈંક ગમતું આવીને મને ઘેરે. લાગે કદીક પેલી ગમતી સુગંધ જેવાં મ્હેકતા'તાં રેશમ શા કેશ લાગે કદીક મેં જે સાચવ્યો રુમાલ જેમાં ફોરમતી રહેતી હમેશ ખૂલતું કબાટ ક્યાંક સ્મરણોનું આજ લાગે ગમતું ગવન કોક પ્હેરે કૈંક ગમતું આવીને મને ઘેરે. લાગે કદીક ઓલ્યા ભવની કોઇ યાદ જેમાં ભીની માટીની મીઠી ગંધ લાગે કદીક જાણે રેતીની ડમરી શો ઘૂમરાતો આવે સંબંધ વાસંતી વાયરા શો મ્હેકે ઘડીક ઘડી બળબળતી લૂ સમું વ્હેરે કૈંક ગમતું આવીને મને ઘેરે. લાગે કદીક ક્યાંક આઘેરું મ્હેકે ને લાગે કદીક સાવ ઓરું ધોધમાર ભીંજવતું લાગે કદીક કદી વરસ્યા વિના જ જાય કોરું છાનો રહે ને ઘડી છતરાયો થાય કોનો આવે અણસાર એના ચ્હેરે ? કૈંક ગમતું આવીને મને ઘેરે. - તુષાર શુક્લ #valentinesday #gujaratipoetry #love #tusharshukla